БИШКЕК, 14-июль — Sputnik. Караколдо биринчи жолу төрт тилкелүү жол салынып жатканын шаардык жол чарбасынын директору Замир Бейшебаев билдирди.
Анын айтымында, курулуш иштерин "СМУ ТТ" ишканасы жүргүзүүдө. Карасаев атындагы көчөдөн Элебаев көчөсүнө чейинки жолдун курулушу үчүн 128 миллион сом бөлүнгөн.
"Курулуш иштери Карасаев менен Кутманалиев көчөлөрүнүн кесилишинен Фучик көчөсү менен лыжа базасына кайрылган жерге чейин жүргүзүлөт", — деди Бейшебаев.
Реконструкция иштеринин биринчи этабына 50 миллион сом бөлүнгөн, анын 16 миллион 700 миңи Ысык-Көл облусунун өнүктүрүү фонду тарабынан берилди. Калган каражат шаардык бюджеттен бөлүнмөкчү.
"Жолдун туурасы – 14 метр келип, узундугу 3 километр 100 метрге жетет. Иш кызуу жүрүп жатат, 2015-жылдын 1-ноябрына чейин ишти толугу менен аяктоону пландаштырып жатабыз", — дейт жетекчи.
Бейшебаев инфраструктураны жакшыртуу үчүн өткөн жылы Караколдо 10 километр жол оңдолгонун кошумчалады.
"Каракол" тоо-лыжа базасы облус борборунан жети километр алыстыкта жайгашкан. Деңиз деңгээлинен 2300 метр бийиктикте турган базада сезон ноябрдан апрелге чейин уланат.
