БИШКЕК, 6-июль — Sputnik. Президент Алмазбек Атамбаев "Эл аралык автожүк ташуу үчүн жагымдуу шарттарды түзүү тууралуу ШКУга мүчө мамлекеттердин өкмөттөр ортосундагы макулдашууну ратификациялоо жөнүндө" мыйзамына кол койду.
Макулдашууга 2014-жылдын 12-сентябрында Душамбе шаарында кол коюлуп, Жогорку Кеңеш тарабынан 2015-жылдын 10-июнунда кабыл алынган.
Документке ылайык, эл аралык автожүк ташуулар төмөнкү мамлекеттик чек ара көзөмөл пункттары аркылуу өтөт: Кант — Ак-Тилек (Кыргызстан) / Карасу (Казахстан) — Тараз — Шымкент — Кызыл-Ордо — Актобе — Жайсан (Казахстан) / Сагарчин (Россия) — Оренбург — Санкт-Петербург (№5 маршрут). Ошондой эле Ат-Баши — Торугарт (Кыргызстан) / Торугарт (КНР) — Кашкар — Үрүмчү — Ляньюньган (№6 маршрут). Аталган каттамдардын 2020-жылга чейин ачылышы күтүлүүдө.
№6 маршрут Кытадын, айрыкча Кашкар, Үрүмчү, андан ары Сары деңиздин жээгиндеги Ляньюнган портуна чейин түз кирүүгө шарт түзөт.
Мыйзамга ылайык, Тышкы иштер министрлигине Кыргызстан ички процедураларды аяктаганы тууралуу кабардар кылуусу тапшырылды.
Аталган мыйзам долбоору расмий жарыялангандан кийин он күндүн ичинде күчүнө кирет.
Шанхай кызматташтык уюму (ШКУ) – Кытай, Россия, Казакстан, Тажикстан, Кыргызстан жана Өзбекстан жетекчилери тарабынан 2001-жылы түзүлгөн аймактык эл аралык уюм. Өзбекстандан башка мамлекеттер 1996-1997-жылдары түзүлгөн "Шанхай бешилиги" уюмуна мүчө болуп келишкен.
