БИШКЕК, 3-июль — Sputnik. Кыргызстандын жарандары – ата-бала Сибирь федералдык округуна мыйзамсыз унаа киргизүүгө аракет кылган деп шектелип жатканын аймактын бажы башкармалыгы билдирет.
Маалыматка ылайык, Кузбасс бажычылары Кемеров облусу боюнча Россиянын Федералдык коопсуздук кызматы менен бирге Сибирге унаа киргизүүнүн жолун буушкан. КР жарандары унаа каражаттарын каттоодо бажы төлөмдөрүн төлөбөө үчүн атайы схема ойлоп табышкан.
"Алар Сибирге көчүп кетип жаткан Токмоктун тургундарына акча берип, чет элдик тогуз унааны алардын атына каттатууга аракет кылышкан. Андан ары Россияга кирген машиналарды кайра каттоо жеңилдетилген тартипте өтмөк", — деп айтылат билдирүүдө.
Аталган жарандар бажы декларациясын Кемероводогу Кузбасс бажы постуна тапшырышкан. Унаалар Россиянын аймагына келгенге чейин алты ай мурун катталышы керек. Мындан улам келтирилген зыяндын көлөмү 5 миллион 462 миң 801 рублди түзгөн. Бул Россия мыйзамы боюнча ири көлөм деп эсептелет.
Мыйзам бузууга барган ата-балага карата эки кылмыш иши козголду.
