БИШКЕК, 24-июнь — Sputnik. Россияга каршы Европа биримдиги киргизген санкциялар кыргызстандык ишкерлер үчүн ыңгайлуу болуп чыкты деп Sputnik кабарчысына кондитердик компаниялардын биринин башкаруучу директору Денис Гайворонский айтты.
Россияга каршы экономикалык санкцияларды 2016-жылдын 31-январына чейин узартуу жөнүндө Европа биримдигинин чечими шейшембиде күчүнө кирди. Москва болсо ЕБден алып кирүүгө тыюу салынган товарлардын тизмесин кеңейтүү чечими туурасында билдирди.
Гайворонскийдин айтымында, анын компаниясы санкцияларга каршы чаралардын себебинен бош калган Россиянын дүкөн текчелерин ээлей алды.
"Кыргызстанда экспорттук товарларды өндүрүүгө бардык шарттар түзүлгөн: бизде либералдуу мыйзамдар, арзан эмгек күчү, арзан электр кубаты бар. Анан калса, биздин өндүрүм экологиялык жактан таза", — дейт ишкер.
Санкциялар киргизилгенден бери компания Москвада төрт дүкөн ачкан жана Казань менен Санкт-Петербургда да бирден түйүн ачууну пландап жатат.
"Санкциялар узартылып, тыюу салынган товарлардын тизмеси кеңейтилиши биздин компания үчүн оңдой берди болду. Россиянын рыногун өздөштүрүп, өз ордубузду тапканга убакыт бар. Түзүлгөн кырдаал кандай болсо да, ишкердикти кыймылдоого мажбур кылат. Мурда алдап-соолап стимул берүүгө аракет кылынса, эми камчы бир топ натыйжалуу болору көрүндү", — деп айтып берди Sputnik маектеши.
Бошогон рынок орундарын ээлегенге Кыргызстандын ресурстары жетиштүү экенин белгиледи ал. Кыргызстандык компаниялар Россия рыногунда ийгиликке жетишүүсү үчүн сабаттуу башкаруу, кесипкөй кызматкерлер жана каржы гана керек деп белгиледи Гайворонский.
Санкцияга Россиянын мамлекеттик банктары жана мунайзат тармагы туш болгон. Европалык инвесторлорго Россиянын беш ири каржы институту: Сактык банкына, Тышкы соода банкына, Газ өнөр жай банкына, Айыл чарба банкына жана Тышкы экономбанкына 30 күндөн ашык мөөнөткө жаңы насыяларды берүүгө, ошондой эле алардын жана 30 күндөн ашык жүгүртүүгө чыккан жаңы акциялары менен бонддорун сатып алууга тыюу салынган.
Суу астындагы чалгындоо жана мунайзат өндүрүү, Арктикада жана РФтин тоо-тектеринен алынуучу мунайзат чыккан жерлерине жабдууларды сатууга жана кызмат көрсөтүүгө тыюу салынган.
Россия азык-түлүккө карата жооп иретиндеги санкцияларды киргизген.
