БИШКЕК, 29-май — Sputnik. Ош облусунун Кара-Суу районундагы Савай айыл аймагындагы Өзбекстанга кетүүчү каналдын тосмолору 27-майда үч жеринен бузулуп, жергиликтүү тургундардын үйлөрүн суу каптоо коркунучу жаралганын Өзгөчө кырдаалдар министрлигинин маалымат кызматы билдирди.
КР Айыл чарба жана мелиорация министрлигинин Суу чарба жана мелиорация департаменти Шархан-Сай магистралдык каналынын бузулган жерлерин оңдоо үчүн сууну убактылуу токтотуу боюнча буга чейин Өзбекстандын Фергана өрөөнүнүн магистралдык каналдар башкармалыгына кат жиберген. Бирок өзбек тараптан эч кандай жыйынтык болгон эмес.
Аталган канал Өзбекстанга таандык болгондуктан, бузулган аймактарды оңдоп-түзөтүү иштерин аткаруу үчүн өзбек тарап менен тез арада сүйлөшүүлөрдү жүргүзүү зарыл деп айтылат ӨКМдин тараткан билдирүүсүндө.
