БИШКЕК, 29-май — Sputnik. Алмазбек Атамбаев премьер-министрге электр энергиясына карата социалдык багыттагы тарифтин өлчөмү тууралуу маселени кайра карап чыгууну сунуштады. Бул туурасында президенттин маалымат кызматы билдирет.
Президент өкмөткө калк үчүн электр энергиясынын тарифин 84 тыйынга чейин жогорулатуу тууралуу чечимди кайра карап чыгууну айтып, кышы катуу жана узакка созулган бийик тоолуу жерлердин жашоочуларына өзгөчө көңүл буруу зарылдыгын белгиледи.
Ошондой эле, ал өкмөт энергияны үнөмдөө саясатын улантууга тийиш экенин айтып, жоготууларды кыскартуу боюнча ишти күчөтүү өзгөчө мааниге ээ экенин билдирген.
"Энергия тармагында коррупцияны жоё тургандай система түзүүгө жетишүү зарыл. Жаңы станцияларды куруп, иштеп жаткандарын жаңылоо зарыл. Жаңы жарык кубатысыз экономиканы чыңдоо жана элдин жашоосун жакшыртуу кыйын", — деген Атамбаев.
Кыргызстан акыркы эки жылдан бери Токтогул суу сактагычындагы суунун көлөмү керектүү өлчөмдө чогулбагандыктан, калкы электр энергиясы менен үзгүлтүксүз камсыздоо үчүн электр энергиясын коңшу мамлекеттерден импорттоп келет. Быйыл жайында Тажикстандан электр энергиясы алынат.
