БИШКЕК, 26-май — Sputnik. Ош шаарында өтө турган "Ош-2015" деп аталган бизнес-форумга Россиядан, Казакстандан, Кытайдан, Бириккен Араб Эмирлигинен, Египеттен жана башка бир катар чет өлкөлөрдөн баш-аягы 200дөн ашуун адам катышат.
Бул иш-чарада өлкөдөгү инвестициялык климат туурасында маалымат берилип жана бизнес-долбоорлор боюнча материалдар көрсөтүлөт. Форумдун катышуучулары топторго бөлүнүп, айыл чарбасы жана кайра иштетүү, тамак-аш өнөр жайы, тоо-кендерин иштетүү тармагы, курулуш жана инвестициялар, туризм жана инфраструктура тармактары боюнча жагдайды талкуулашат.
"Жаш ишкерлер ассоциациясынын" өкүлдөрү бизнести алып кетүү жана инвестиция тартуунун ийгиликтүү моделдери туурасында айтып беришет. Андан сырткары, ишкерлердин потенциалын жогорулатуунун канчалык деңгээлде маанилүү экендиги жана бизнести жүргүзүүнүн жаңы ыкмалары туурасында да маалымат менен бөлүшөт.
