БИШКЕК, 15-май — Sputnik. 16-17-майда өлкө аймагында аба ырайы кескин өзгөрүп, күн күркүрөп, бийик тоолуу аймактарда кар жаашы мүмкүндүгүн Өзгөчө кырдаалдар министрлиги билдирди.
Айрым райондордо батыштан соккон шамалдын ылдамдыгы секундасына 17-22 метрге чейин жетип, ал нөшөрлөгөн жамгыр менен коштолот.
Мындай жаан-чачын айыл чарба иштерин, автоунаа, энергетика жана коммуналдык кызматтардын ишин жана айыл чарбачылыгында жайыттарда мал кармоону кыйындатат.
Ошондой эле күтүлүп жаткан нөшөрлүү жаан-чачынга байланыштуу республиканын тоолуу жана тоо этектериндеги райондордо сел жүрүп, дарыяларда суунун көтөрүлүшү ыктымал.
Буга чейин жаап өткөн нөшөрлүү жаандан улам, Талас, Жалал-Абад облусунун айрым аймактарында сел жүрүп, бир катар чыгымдарды алып келген. Өзгөчө кырдаалдар министри Кубатбек Боронов жабыр тарткан селден коргоочу курулуштарды министрлик тез аранын ичинде оңдоп, селдин кесепеттерин жоюу боюнча тийиштүү башкармалыктарга тапшырма берген.
