БИШКЕК, 23-апр. — Sputnik. Премьер-министр Жоомарт Оторбаевдин отставкасы Кыргызстандын Евразиялык экономикалык биримдикке кирүүсү боюнча документтерге кол коюсуна эч кандай терс таасир тийгизбейт. Бул туурасында Экономика министрлигинин маалымат кызматы билдирди.
Бейшемби күнү парламенттин жыйынында өкмөттүн 2014-жылдагы иши боюнча отчет бергенден кийин өкмөт башчысы Жоомарт Оторбаев отставкага кете турганын жарыя кылды.
Экономика министрлигинен Кыргызстандын Евразиялык экономикалык биримдикке кирүү ниети күчүндө калат деп билдиришти.
"Буга ЕЭАБдин курамына кирүүгө байланышкан бир катар документтерди ЕЭКтин жыйынында талкууга катышуу үчүн экономика министринин Москвага учуп кеткендиги далил деп билдиришти министрликтин маалымат кызматынан.
Шаршемби күнү Сариев Sputnik маалымат сайтына берген эсклюзивдүү маегинде Москвада вице-премьерлердин деңгээлинде документтер талкуулана турган бир нече жыйындар калгандыгын билдирген.
Сариев президент документтерге кол коё турган күндү жылдырышына эч негиз жоктугун билдирди.
"Декабрда өзүбүздүн сунуш-пикирлерди билдиргенбиз. Бизди бул багытта Армения, Белоруссия, Казакстан жана Россия колдойт. Мамлекет башчысы Алмазбек Атамбаев Кыргызстандын Евразиялык экономикалык биримдикке кирүүсү боюнча документтерге 2015-жылдын 9-майында кол коюларын жана бул дата жылдырылбай тургандыгын айткан", — деди министр.
Белоруссия, Казакстан жана Россия 2014-жылы Астанада ЕЭАБди түзүү боюнча келишимге кол коюп, ал 2015-жылдын 1-январында күчүнө кирген. Быйылкы жылдын май айында Кыргызстандын да ЕАЭБге кирүүсү күтүлүүдө. Ошентип, КМШ алкагындагы жалпы ири рыноктун калыптанышы аягына чыгып бара жатат. Ал экономикалык өнүгүү жаатында жаңы ири кубаттуу борбор болуп калмакчы.
