БИШКЕК, 23-апр. — Sputnik. Премьер-министр Жоомарт Оторбаев отставкага кете тургандыгын айтты. Ал мындай чечимин Жогорку Кеңештин жыйынында 2014-жылдагы өкмөттүн жасаган иштери боюнча отчёт берип жатып билдирди.
Оторбаев Жогорку Кеңеш өкмөттүн ишин канааттандырарлык деп кабыл алганы үчүн рахмат айтып, бул иш бир гана кишинин эмгеги эместигин кошумчалады. Ал, ошондой эле, демократиялуу өлкөдө бийликке жеке ээлик кылуучулук болбошу керектигин белгиледи.
"Өкмөттүн жасаган иши бир гана кишиге таандык эмес. Албетте, коюлган бардын максаттарга жете алган жокпуз. Демократиялуу өлкөдө бийликтин монополиясы болбошу керек. Өлкөгө жаңы көз караш, максат жана амбиция зарыл. Аткаруу бийлигин силкүү керек. Андыктан мен отставкага кетип жатам", — деди Оторбаев.
Ал көпчүлүк коалицияга жана Жогорку Кеңешке иштөөгө берген мүмкүнчүлүгү үчүн ыраазычылык билдирип, депутаттар өкмөт башчылыгына татыктуу талапкерди тандай турганын кошумчалады.
Оторбаев өкмөттү былтыр 9-апрелден тартып башкарып келген.
