БИШКЕК, 8-янв — Sputnik. 2008-2014-жылдары Нарын облусу боюнча 3 миллион 637 миң баш кой бруцеллезго каршы РЕВ-1 вакцинасы менен эмделгенин Sputnik сайтына Нарын облустук ветеринардык жана фитосанитардык коопсуздук боюнча инспекциясынын башчысы Жалил Алымкулов билдирди.
Анын айтымында, 2008-жылы Дүйнөлүк банктын сынамык долбоорунун алкагында РЕВ-1 вакцинасы менен койлордун көзүнө тамчылатып дарылоо ыкмасы башталган. Бул долбоор боюнча 2008-2014-жылдары 43 миллион 263 миң 915 сом инвестиция келген. Анын 19 миллион 709 миң сому мал доктурлардын эмгек акысына төлөнүп берилсе, калган каражаттар вакцина, кеңсе эмеректерин жана башка керектүү жабдууларды алууга жумшалган.
Жалил Алымкулов сынамык долбоордун алкагында кишилер арасында бруцеллез менен ооругандар 3 эсе азайганын кошумчалады.
"2008-жылга салыштырмалуу учурда бруцеллез дартына чалдыккандардын саны дээрлик 3 эсе азайды. 2009-жылы 436 киши ооруган болсо, 2010-жылы 210 киши чалдыкса, 2014-жылы 64 киши гана бул дарт менен ооруган", — деди ал.
Алымкулов бруцеллез оорусу койдон жугаарын белгилеп, жарандар бул дартты мал төлдөп аткан учурда көп жуктурарын кошумчалады.
