БИШКЕК, 8-янв — Sputnik. Нарын облусуна норматив боюнча 396 мал доктур керек, бирок, учурда облус боюнча 190 гана мал доктур иштеп жатат. Бул тууралуу Sputnik сайтына Нарын облустук ветеринардык жана фитосанитардык коопсуздук боюнча инспекциясынын башчысы Жалил Алымкулов билдирди.
"Норматив боюнча 800 баш малга 1 ветеринар, 1 ветеринардык техник жана 1 санитар керек. Бирок муну камсыздоо өтө оор. Андыктан биз шарттуу 800 баш малга жок дегенде 1 ветеринар болсо деп жатабыз. Облуста 1 миллион 386 миң 284 баш мал бар. Малдын санына карата бөлө келгенде, бизге 396 ветеринар керек. Учурда, бизде болгону 190 гана мал доктур бар", — деди ал.
Жалил Алымкулов белгилегендей, 190 мал доктурдун 150и жеке менчик тарап катары иштесе, 40ы мамлекеттик ветеринардык кызматкерлер. Мал доктурлардын 53%ы пенсия курагындагылар, башкача айтканда, 50 жаштан 65 жашка чейинкилер.
Өткөн жылдын октябрь айында жарыяланган бир айлыктын жүрүшүндө 19 248 баш ири мүйүздүү малдан, 532 баш жылкыдан, 542 баш майда жандыктан кан алынып, лабораторияга текшерүүгө жөнөтүлгөн.
Ошондой эле, шарп ылаңына каршы 52 270 баш ири мүйүздүү мал, күл ылаңына каршы 88 миң баш кой, бруцеллез ылаңына каршы 465 414 баш токту-чебич, пастереллёз ылаңына каршы 391 573 кой-эчки жана чумага каршы 75 694 баш кой-эчки эмделген.
