БИШКЕК, 13-фев. — Sputnik. UFC уюмунун жеңил салмактагы чемпиону Валентина Шевченко 2020-жылдын 7-августуна чейин беттештерге катышуудан четтетилди. Мындай чечимди Техастын мелдештерге уруксат берүү жана жөнгө салуу департаменти Хьюстондо өткөн UFC 247 турниринен кийин кабыл алган.
Аталган турнирде кыргызстандык мушкер америкалык Кэтлин Чукагянды техникалык нокаут менен жеңген. Ал үчүнчү раундда атаандашынын бир колун буттары менен бекитип, муштум, чыканактары менен башка ургулап баштаган. Мындан улам рефери беттешти токтотууга аргасыз болгон. Натыйжада 31 жаштагы спортчу чемпиондук наамын үчүнчү ирет коргоп калды.
Департамент жарыялаган документке ылайык, Шевченко беттештерден жарым жылга четтетилди. Ал эми Чукагяндын тыным алуу убактысы жарым айга (25-март) чейин гана созулат. Дарыгерлердин комиссиясы мындай чечимди ийне-жибине чейин түшүндүргөн эмес.
Алдыңкы спорттук басылмалардын жазганына караганда, мындай узак убакытка созулган тыным олуттуу ойлорду жаратат.
UFC 247 турнирине катышкан үч мушкер, анын ичинде Шевченко көпкө чейин беттешке чыкпайт. Ал эми кеченин башкы беттешинде беш раунд бою кармашкан Жон Жонс менен Доминик Рейес бир айга чейин эле тыным алган.
"Балким Шевченко ойлогондон да көп жаракат алды же беттешке чейин эле машыгуу убагында бир жерин оорутуп алган", — деп болжолдогон Heavy спорттук порталы.
Кээ бир ЖМКлар Шевченко менен беттешип нокаутка түшкөн Жессика Айдын деле тынымы төрт айга созулганын жазышты. Анда кыргызстандык мушкер Айды башка тээп кулатып, наамын биринчи ирет коргогон.
This might be one of the craziest knockouts I've ever seen. She was knocked out for close to two minutes. #UFC238 pic.twitter.com/DVfoW36pMZ
— Keaton (@ChirpinParaKeat) June 9, 2019
Шевченко менен Чукагяндын беттешин видеодон көрсөңүз болот.
