БИШКЕК, 13-сен. — Sputnik. Белгилүү журналист, саясатчы, коомдук ишмер Мелис Эшимканов эскерилет. Бул туурасында журналисттин жубайы Асел Эшимканова билдирди.
Иш-чара 15-сентябрь күнү саат 11:00дө маркумдун "Ала-Арча" көрүстөнүндөгү эстелигинин алдында өтөт.
"Журналистика чөйрөсүндөгү, чыгармачылыктагы ага-эжелер, кесиптеш-замандаштар, саясаттагы үзөңгүлөштөрү, жалпыңыздарды кайталангыс инсанды бирге эскерүүгө чакырабыз!" — деп кайрылды Эшимканова.
Эгемен Кыргызстандын журналистикасынын чыйыр салуучуларынын бири, калеми күчтүү журналист, саясатчы, коомдук ишмер, Жогорку Кеңештин 3-чакырылышынын депутаты, азыркы кыргыз басма сөзүндө эмгектенген журналисттердин жоон тобунун устаты Мелис Эшимканов көзү тирүү болсо быйыл 59 жашка чыкмак. Ал мындан 10 жыл мурда жарык дүйнө менен кош айтышкан.
