БИШКЕК, 2-ноя. — Sputnik. Бишкек жана Ош шаарларынан Россиянын Новосибирск шаарына туруктуу авиакаттамдар жаңыланып жатат. Бул тууралуу Россиянын Кыргызстандагы элчилигинен билдиришти.
Маалыматка караганда, "S7" авиакомпаниясынын билеттерин каалаган адам сатып алса болот. Учактар Бишкек — Новосибирск багыты менен жума күндөрү, Ош — Новосибирск багыты менен бейшемби күндөрү учат.
Эске салсак, буга чейин аптасына бир ирет Бишкек — Москва багыты менен "Аэрофлот" жана "Авиа Траффик” компанияларынын учактары каттап жаткан.
Казакстанга кирип-чыгуунун жол-жобосу
Аталган өлкөгө баруунун дагы бир жолу — атайын уюштурулуп жаткан чартердик каттамдар. Алар менен төмөндөгүдөй кырдаалда кетсе болот:
- Россиянын жараны болгон жакын тууганы (аялы/күйөөсү, балдары, ата-энеси) болсо;
- медициналык кызматка муктаж болуп жатса (кабыл алуучу тараптын чакыруусу керек);
- кандайдыр бир мамлекеттик программага катышып жатса;
- Россияда туруктуу жашоого уруксаты болсо.
Сүйлөшүлгөн тартипке ылайык, Россияга бара жатканда кыргызстандыктардын колунда ПЦР-тесттин "ооруган эмес" деген жыйынтыгы болушу шарт. Ал аталган мамлекетке учканга үч күн калганда жасалышы керек.
