Медициналык окуу жайларда гранттык орундар көбөйөт. Жээнбеков жаңы чечим тууралуу

© Sputnik / Александр Кондратюк / Медиабанкка өтүүМедициналык окуу жайы. Архив
Медициналык окуу жайы. Архив - Sputnik Кыргызстан
Жазылуу
Өлкө башчы белгилегендей, медициналык кызмат көрсөтүүнүн сапатын жакшыртуу, бардык чөйрөлөрүнө санарип технологиясын кеңири киргизүү — өзгөрүүнүн негизги максаты.

БИШКЕК, 1-окт. — Sputnik. Медициналык жогорку окуу жайларда гранттык орундарды көбөйтүү боюнча чечим кабыл алынды. Бул тууралуу президент Сооронбай Жээнбеков билдиргенин анын маалымат кызматынан кабарлашты.

Бүгүн, 1-октябрда, мамлекет башчы коронавирус пандемиясына каршы күрөштө өзгөчөлөнгөн жарандарга мамлекеттик сыйлыктарды тапшырды. Өз сөзүндө президент медицина жаатында түзүлүп жаткан шарттар тууралуу да кеп кыла кетти.

Сооронбай Жээнбеков пандемияга каршы күрөштө өзгөчөлөнгөн жарандарды сыйлады

"Учурда жаңы медициналык объектилер курулуп, эскилери оңдолууда. Медициналык кадрлардын жетишсиздигин эске алып, медициналык жогорку окуу жайларында гранттык орундарды көбөйтүү жөнүндө чечим кабыл алынды", — деди президент.

Жээнбеков аткарчу иш, чече турган маселе көп экенине токтолду.

"Илдетке каршы күрөш саламаттык сактоо тармагындагы көп жылдар бою топтолуп келген көйгөйлөрдү ачыктады. Эң негизгиси, мындай оорулар боюнча адистешкен медицина кызматкерлеринин жетишсиздигин көрсөттү. Саламаттык сактоо тармагындагы көйгөйлөрдү чечүү үчүн системалык өзгөрүүлөр зарыл. Бул маселени Коопсуздук кеңешинин кароосуна алып чыгабыз. Атайын жыйын өткөрөбүз. Бардык мамлекеттик мекемелердин илдетке каршы биргеликте иштөөсүн камсыз кылуу үчүн негизги багыттарды аныктап, милдеттерди коебуз", — деди өлкө башчы.

Жээнбеков белгилегендей, саламаттык сактоо системасын башкаруунун, медициналык кызмат көрсөтүүнүн сапатын жакшыртуу, ошондой эле бардык чөйрөлөрүнө санарип технологиясын кеңири киргизүү өзгөрүүнүн негизги максаты болот.

Жаңылыктар түрмөгү
0