Кыргызстанда кимдин тик учагы бар? Тизме

Кыргызстанда санитардык авиация кызматы иштейт. Анын карамагында аба техникасынын болушу шарт. Бирок аталышына карабастан, бул кызматтагы медиктердин авиациялык жабдыгы жок.

Бейтаптарга көмөк көрсөтүүгө үлгүрүү үчүн дарыгерлер Саламаттык сактоо министрлигинин гаражындагы унааларды ижарага алышат. Өзгөчө кырдаалдарда тик учак сурап өлкөнүн Куралдуу күчтөрүнүн Башкы штабына же жеке компанияларга кайрылышат.

Ушул себептен Sputnik агенттиги Кыргызстанда тик учактарга ким ээлик кыларын, кандай шарттарда алардын кызматынан пайдаланууга мүмкүн экендиги тууралуу тактоону чечти.

Өзгөчө кырдаалдар министрлигинин карамагында 1992-жылкы чыгарылыштагы тик учак бар, ишке берилгенден тарта аны кармоого бюджеттен каражат бөлүнбөй келет. Бир нече жыл мурун ал техниканын пайдалануу мөөнөтү бүткөн. Тик учакты оңдоого 1,5 миллион сомдун тегерегиндеги каражат талап кылынат. Өзгөчө кырдаал жаралганда ӨКМ Башкы штабга же жеке компанияларга кайрылууга аргасыз, алар да андай өтүнүчтү өз ылайыгына карап чечет. Акыркы ирет тоодо жаракат алган туристти ойго түшүрүү үчүн тик учак керектелип, Башкы штаб макул болбой койгон.

Башкы штабдын карамагында бир нече тик учак бар. Мекеменин маалымат кызматынан билдиришкендей, аскерий аба техникасынын так саны мамлекеттик сыр болуп саналат.

Өлкөдөгү тик учактардын бири Ага Хан фондусуна таандык. Уюм бул аба каражатын туризм жаатындагы компаниялар жана жеке адамдарга келишимдин негизинде берет.

Транспорт министрлигинин алдындагы Жарандык авиация агенттигинин расмий сайтында ар кандай уюмдардын атына жазылган 9 тик учак катталган.

Heli Sky туристтик компаниясынын төрт тик учакка ээлик кылат. Алардын бири 1991-жылкы чыгарылыштагы Mi-8MTV-1 жана дагы Mi-171 тик учагы бар. Ишкана Кыргызстан боюнча саякаттарды, өлкөнүн алыскы булуң-бурчуна сапарларды уюштурат.

Heli Sky компаниясынын сайтында белгилендей, бул уюм чет элдик туристтерге басым жасайт.

Аба каражаттарын оңдоого адистешкен "Аэростан" ЖЧКсына Mi-8MTV-1 үлгүсүндөгү эки тик учак катталган. Мындай аба жабдыгы дүйнөдөгү эң кеңири таралган эки кыймылдаткычтуу тик учак болуп саналат (12 000ден ашуун санда чыгарылган), ошондой эле авиация тарыхындагы эң көп колдонулган тик учактардын тизмесине кирет. Дүйнөнүн көп өлкөлөрүндө жарандык жана аскерий багыттагы иштерде пайдаланылат.

CAAS (Central Asia Avia Service) ишканасына дагы төрт: эки Mi-8MTV-1, бир Mi-8AMT жана бир Mi-8Т тик учагы катталган. Аталган ишкана MI-8T үлгүсүндөгү тик учактарды техникалык жактан тейлөө жана аларды модификациялоо менен алектенет. Новосибирск авиациялык ремонттоочу заводунун жардамында иш жүргүзгөн бул завод кыргыз-россиялык биргелешкен мамлекеттик ишкана болуп саналат.