17:01 12 Бештин айы 2018
Түз эфир
  • USD69.8300
  • EUR79.0615
  • RUB1.0513
Улица Аалы Токомбаева в Бишкеке

Быйыл жазда турак жай менен унаа кымбаттайбы? Серепчилердин пикири

© Sputnik / Табылды Кадырбеков
Коом
Кыскача шилтеме алуу
Бакыт Толканов
164701

Салтка айлангандай, ар жазда унаа менен кыймылсыз мүлк баасы көтөрүлүп кетет. Sputnik Кыргызстан быйыл баанын өсүш ыктымалы бар-жогуна кызыкты.

Кыргызстандыктардын дээрлик көпчүлүгү эң биринчи кезекте үстүнө үй жана алдына авто сатып алууну тилек кылат. Ошондуктан батир жана унаа баасы калк үчүн орчундуу гана тургай, көп учурда эң талуу маселеге айланат. Sputnik Кыргызстан редакциясы бул көктөмдө баа жагдайын тактап көрдү.

Батирлердин баасы өстү

Кыймылсыз мүлк боюнча адис Полина Мартынова негизинен баа жазында жана күздө өсө турганын белгилейт.

"Эгер күзүндө баанын көтөрүлүшүнө түшүмдүн жыйналышы жана мигранттардын акча которуусу таасир этсе, жазында андай агым болбойт. Болгону кыштан чыкканда адамдар жандана түшөт. Адатта батир жана автомобиль 4-5 пайызга кымбаттайт", — деди адис.

Анын айтымында, баа саясий туруксуздук болсо өспөйт, эл кыймылсыз мүлк алуудан же сатуудан чочулайт. Быйыл бул багытта абал тынч, демек баа жогорулай баштады.

"Маселен, борбор калаанын "Аламүдүн" кичирайонундагы бир бөлмөлүү батир кышында 26-26,5 миң доллар турчу. Азыр ошондой эле батир 28 миңге чыкты. Бирок андан да көтөрүлөбү же жокпу, азырынча айта албайм", — деди ал.

Турак жай кымбаттабайт, бааны эч ким ыгы жок көтөрбөйт

Ал эми КР Риелторлор бирикмесинин башчысы Сергей Пьянков буга ача пикирде. Анын баамында, экинчи кол рыногунда турак жай баасы эч козголо элек.

"Баасынын өсүшү да, төмөндөшү да күтүлбөйт. Буга калктын колунда ашыкча каражаттын жоктугу, ошондой эле доллар кунунун туруктуулугу да себеп. Доллар курсунун буга кандай тиешеси бар? Соңку бир нече жылдан бери кыймылсыз мүлк наркы сом түрүндө мурдагы калыбында, болгону курстун алмашышынан улам доллар менен бааланган учурда гана айырма бар", — деп түшүндүрдү Пьянков.

Ал арзан ипотека киргизилген соң гана баалар өзгөрүшү мүмкүн экенин кошумчалады.

Жаңы курулган турак жай жагдайы кандай?

"ЖИА" бизнес биримдигинин курулуш комитетинин төрагасы Нарбек Абдуллаев калктын колунда ашыкча каражат жоктугун айтат.

"Акыркы жылдары баа менен сунуш айкалышууда, чарчы метрлик аянт наркын ашкере жогорулатпоо үчүн курулуш ишканаларынын ортосунда да өз ара түшүнүшүү орногон. Андыктан баа менимче, өзгөрбөйт", — деди ал.

Абдуллаевдин маалыматына таянсак, жаңы турак жайдын бир чарчы метринин баасы 450дөн 1200 долларга чейин жетет, орточо баа 700 долларды түзөт.

Авто унаа кайрадан байлыкка айланабы?

Автоунаа жылдын ар кыл убагында кымбатташы ыктымал. Мындай пикирди РИОМ базарынын мурдагы аткаруучу директору Айбек Баратов айтты.

"Өлкөдө жакшы автоунаалар таңсыктыгы курч, көпчүлүк унаалар үчүнчү-төртүнчү колго өттү. Бирок экинчи жагынан машиналар эскирип, алардын абалы начарлап барат. Ошондуктан баа анчалык жогорулабайт. Мисалы, Honda Fit үлгүсүндөгү унаа азыр 3-3,5 миң доллар турат. Жакшы абалдагы Honda Fit жазында эң көп дегенде 500 долларга кымбаттайт", — деп белгиледи Баратов.

Соңунда ал жаңы оюнчулардын, тагыраагы, чөнтөккө төп тандамдарды сунуштаган өзбек автоөндүрүшчүлөрүнүн кириши да авторынокту ооздуктап турарын белгиледи.

Авто баасы мурдагы бойдон калат

Авторынок боюнча адис Дмитрий Федянин авто баасы көп учурда тышкы таасирлерден көз каранды экенин айтып берди.

"Бирок эгер рубль мурдагыдай кармалып турса, анда баа да өзгөрүүсүз калат. Дагы бир жагдай — биздин рынокто сунуштардын саны жетишерлик, бааны ыгы жок жасалма жогорулатуу маңызсыз", — деп түшүндүрдү Федянин.

Ал рублдин куну көтөрүлсө, унаа да кымбаттай турганын кошумчалады.

Тема боюнча

BMW X5 — 5,5 миң доллар. Кыргызстандагы эң ири унаа базарындагы баалар
Электр энергиясын кымбаттатуу керекпи же жокпу? Адистердин түшүндүрмөсү
Белгилер:
серепчи, базар, турак-жай, унаа
Колдонуу эрежелериПикирлер

ЭҢ МААНИЛҮҮ