БИШКЕК, 15-сен. — Sputnik. Белгилүү боксчу Орзубек Назаровдун кызы кабылган жол кырсыгы боюнча Бишкек шаарынын прокуратурасы кылмыш ишин козгогонун Башкы прокуратуранын маалымат кызматы билдирди.
Мотоцикл менен Toyota Passo үлгүсүндөгү машина 19-августтун түнүндө Чүй проспектиси менен Тоголок Молдо көчөлөрүнүн кесилишинде кагышкан. Мотоциклди айдап бараткан 21 жаштагы бала жеринде каза болуп, машинанын ичиндеги үч киши түрдүү жаракаттарды алып, ооруканага жеткирилген. Алардын бирөө кийин алган жаракатынан улам каза болгон. Ошондой эле мотоциклчендин артында отурган кыз да оор жаракат алган. Ал Орзубек Назаровдун кызы экени кийин билинген.
Прокуратура милиция кызматкерлерине карата мотоциклченди негизсиз кууган деп шек санап, жол кырсыгына кабылган кишилерди кооптуу абалда таштап кетүү беренеси боюнча кылмыш ишин козгоду. Эки милиция кызматкери буга чейин кызматынан четтетилген болчу. Көзөмөл органынан маалымдашкандай, 19-августта Кайгуул милициясы өзүнүн кызмат өтөө аймагынан чыгып, мотоциклченди мыйзамсыз кууган. Ошол эле учурда алар жолдо жүрүү боюнча кызматтык талапты бузганы баса белгиленет.
"Кайгуул милициясы жол кырсыгы болгон жерден изин жашырып кеткен", — деп айтылат прокуратура тараткан билдирүүдө.
Аталган иш тергөө үчүн Улуттук коопсуздук мамлекеттик комитетинин Тергөө башкармалыгына берилди.
Кырсык болгондун эртеси Назаров кызы өзүнө келе электигин билдирип, ага кан керектигин айтып, элге кайрылган. 21-августта ал кайрылуусуна көңүл кош карабаган жарандарга ыраазычылыгын билдирген. 31-августта Назаровдун кызы Аделина өзүнө келген.
