БИШКЕК, 15-Июн. — Sputnik. Быйыл күзүндө өтө турган президенттик шайлоо өлкө тарыхындагы эң таза жана адилеттүү шайлоо болуп каларын Борбордук шайлоо комиссиясынын төрайымы Нуржан Шайлдабекова маалымат жыйында айтты.
14-июнь күнү Жогорку Кеңеш өлкө башчысын шайлоону 15-октябрга белгилеген токтом кабыл алды. Ал эми 15-июндан тарта бардык каалоочулар президенттикке талапкерлигин көрсөтө алат. Ушул эле токтомдо БШКга шайлоону таза жана ачык-айкын өткөрүү боюнча тапшырма берилген.
"Шайлоо комиссиясы добуш берүүнү уюштурууга багытталган бир катар чечимдерди кабыл алды. Талапкерлер үчүн бирдей шарттар түзүлүп, таза жана адилет шайлоо өткөрүү үчүн бардык чаралар көрүлөрүнө ишендирип кетким келет", — деди Шайлдабекова.
Шайлдабекова талапкерлерди шайлоочулардын добушуна ээ болууга чакырып, шайлоонун жыйынтыгы калыс болорун убада кылды.
