БИШКЕК, 21-фев. — Sputnik. Ысык-Көл облусунун Түп районунда бир ай мурун жоголгон эки балыкчы табыла элек. Бул тууралуу ӨКМ маалымат кызматы кабарлады.
Балыкчылар үйүнөн 30-январь күнү чыгып кетишкен.
"Кутургу айылы менен Фрунзе айылынын ортосундагы көлгө Күрмөнтү айылынын тургундары 35 жаштагы Айбек Эталиев жана 27 жаштагы Урмат Суркашкаев балык кармоо үчүн үйүнөн чыгып кетишкен. Аларды издөө иштери 31-январдан 10-февралга чейин уланып, жыйынтык болбогондуктан балдардын жакындарынын макулдугу менен издөө убактылуу токтотулган", — деп жазылат ӨКМдин маалыматында.
Маалыматка ылайык, 20-февраль күнү кайрадан издөө иштери башталып 10го чукул куткаруучу тартылган. Азырынча майнап жок. Издөө иштери 21-февралда да улантылат.
