Асылдар, залкарлар менен... Күлүйпа Кондучалованын сүрөттө калган ирмемдери

Бул инсандын 100 жылдыгына карата Кыргызстанда "Күлүйпа Кондучалова жана кыргыз маданияты" деп аталган жумалык аяктады.

Күлүйпа Кондучалова 1920-жылы Фрунзе шаарынын четиндеги Кара-Жыгач айылында дыйкандын үй-бүлөсүндө туулган. Кичинекей кыз сегиз жашында мектеп босогосун аттап, кийин борбор калаадагы педагогикалык училищеге тапшырып, аны 1938-жылы  аяктаган. Андан соң Нарын облусундагы Куланак айылындагы орто мектепте мугалим болуп эмгек жолун баштаган. 20 жашында Тянь-Шань облустук комсомол комитетинин катчысы болгон. Кийин Фрунзе облустук компартияда бөлүм башчынын орун басары, Коммунисттик партиянын борбордук комитетинде Аялдар менен иштөө бөлүмүнүн жетекчиси, Жалал-Абад обкомунун катчысы болуп эмгектенип,  мамлекеттик кызматтын бардык баскычтарынан өткөн. 27 жашында Кыргыз ССРинин Жогорку Советинин депутаты болуп шайланып, эки жылдан кийин төраганын орун басары кызматын аркалаган.

Эң кызыгы, 1953-жылы Министрлер кеңешинин төрагасынын орун басары,  Кыргыз ССРинин жаңы ачылган тышкы иштер министринин милдетин да аткарат. 1958-жылы маданият министри болуп дайындалып, 60-жылдардын башында эки министрликти башкарган. Кыргыз Республикасынын Баатыры 22 жыл министр болгон. Бул мезгилде Кыргыз ССРиндеги маданиятты жогорку деңгээлге чыгарып, кадрларды, адистерди даярдап, бир топ мекемелерди колдонууга берген. Кондучалова өмүрүнүн аягына чейин Кыргыз Республикасынын тарых жана маданият эстеликтерин коргоо коомун жетектеген. Ооруп жатканда шакирттерине "маданиятты сактагыла" деп керээзин айткан.

I жана III даражадагы "Манас" орденинин ээси 2013-жылы 7-сентябрда Бишкек  шаарында 93 жаш курагында дүйнө салган.