БИШКЕК, 3-дек. — Sputnik. Жалал-Абадда үлпөт тойдо болгон мушташ боюнча беш киши кармалганын Жалал-Абад шаардык милициясынын маалымат кызматы билдирди.
Мушташ эки башка тойго келгендердин арасында болгон. Кара-Дарыя айылынан келген коноктор Ырыс айылынан келгендер менен мушташкан. Окуя Жалал-Абад шаарына кире бериштеги Курманбек баатырдын эстелигинин тушунда болгон.
Окуя болгон жерге милиция келип, Кара-Дарыя айылынын беш тургунун кармаган. Фотографтын мээси чайкалып, ооруканага жеткирилген. Кийин ал Кара-Дарыя айылынын тургундарынын үстүнөн арыз жазган.
Милициянын берген маалыматына ылайык, мушташка катышкандардын баары мас абалында болгон. Аталган факты боюнча кылмыш жаза кодексинин "Бейбашчылык" беренеси боюнча кылмыш иши козголду.
Жалал-Абадда ушундай эле окуя буга чейин катталып, чатак салгандар көчө шыпырып коомдук иштерге тартылган болчу.
