БИШКЕК, 30-июнь — Sputnik. Кыргызстандын өкмөтүнө караштуу Мамлекеттик каржыы рыногун башкаруу жана көзөмөлдөө кызматынын мурунку жетекчиси Юруслан Тойчубеков өлкө бюджетине 30 миллион сомдук зыян келтиргенин ИИМдин Башкы тергөө башкармалыгынын жетекчисинин орун басары Нурлан Утемисов билдирди.
Утемисовдун билдирүүсүндө, Кыргызстанда "Элдик лотерея" аталган утуш оюндарын өткөргөн "Райдер Эссошиэйтед Лимитед" компаниясынын филиалы өлкө казынасына лотерея жөнүндө мыйзамга ылайык кирешенин 10 пайызын төлөгөн эмес. Натыйжада бюджет 31,5 миллион сомдон куру калган.
"Компания филиалы Тойчубеков менен көмүскө сүйлөшүүлөрдү жүргүзгөн. Натыйжада Тойчубеков "Райдер Эссошиэйтед Лимитед" компаниясына лотерея оюндарын өткөрүү үчүн мыйзамсыз уруксат берип, бюджетке төлөнүүчү төлөмдөрдөн бошоткон", — деди Утемисов.
Анын айтымында, компаниянын жалпы кирешеси 315 миллион сомду түзгөн.
ИИМдин билдирүүсү боюнча, Тойчубековдун кайда экени учурда белгисиз.
"Райдер Эссошиэйтед Лимитед" түрк компаниясы 2013-жылдын январь айында филиалын ачып, "Элдик лотерея" брендинин негизинде иштеп келген.