БИШКЕК, 11-сен. — Sputnik. Президент Садыр Жапаров ЖККУнун башкы катчысы Имангали Тасмагамбетовду кабыл алды. Бул тууралуу өлкө башчынын маалымат кызматы билдирди.
Жапаров аскердик-саясий чөйрөдө кызматташууну жакшыртуу үчүн бул иш-чаранын маанилүүлүгүн айтты. Ал ошондой эле машыгуулардын жүрүшүндө коопсуздукту жана коргонуу жөндөмдүүлүгүн бекемдөө боюнча биргелешкен аракеттер ийгиликтүү иштелип чыгып, ар кандай сценарийлер сыноодон өткөнүн кошумчалады.
“Президент азыркы тапта Кыргызстандын мамлекеттик органдары 2025-жылы ЖККУга төрагалыгынын алкагында карала турган артыкчылыктуу багыттарды иштеп чыгып жатканын белгиледи”, — деп айтылат маалыматта.
Ал эми Тасмагамбетов Кыргызстандын жетекчилигине машыгууларды сапаттуу даярдап өткөргөнү үчүн ыраазычылык билдирген. Башкы катчы Садыр Жапаровго өткөрүлгөн машыгуулар мамлекеттердин жамааттык жана улуттук коопсуздугуна келтирилген ар кандай чакырыктарга жана коркунучтарга жооп кайтарууга уюмдун даярдыгынын жогорулагандыгын көрсөткөнүн маалымдаган.