БИШКЕК, 30-май — Sputnik. Бишкек шаардык кеңешинин жыйынында вице-мэр Нурдан Орунтаевден "Батуми" кафесин бузуу боюнча кылмыш иши козголгондон кийин отставкага кетер-кетпеси тууралуу сурашты.
Орунтаев ал тууралуу депутаттар чечпей турганын, бирок кете турган болсо алар биринчи болуп угарын айтты.
Депутаттардын бири кафенин ээсине зыяндын ордун толтуруп берүү үчүн 3 миллион сомду каяктан аларын сурады. Орунтаев учурда тергөө жүрүп жаткандыктан бул суроого жооп бербесин билдирди. Ошондой эле вице-мэр акчаны төлөөгө макул болдубу же жокпу деген суроого да жооп берүүдөн баш тартты.
"Кандай иштеп келсек, ошондой эле иштеп жүрө беребиз. Бүгүнкү күндө түрттүрүү иштери токтотулду, анын качан жанданары азырынча белгисиз", — деди Орунтаев.
Белгилей кетсек, Орунтаев 24-май күнү атайын техника менен барып кафени буздуруп, ичиндеги буюм-тайымдарды сыртка чыгартып салган. Ал кафе мыйзамсыз курулганын, бузуу боюнча алдын ала кабарлама берилсе ээси тоготпой койгонун айтууда.
Окуя болгон күндүн эртеси кафеге УКМК төрагасы Камчыбек Ташиев барып, эгер сүрдүрүү мыйзамсыз болсо күнөөлүүлөрдү жоопко тартууга тапшырма берген. Өз кезегинде жактоочу Орунтаевдин үстүнөн арыз жазганын билдирген.
Андан соң атайын кызмат Нурдан Орунтаевге жана мэриянын кызматкерлерине эки берене менен кылмыш ишин козгогон. Тергөөнүн жүрүшүндө Орунтаев жабырлануучу тарапка келтирилген 3 миллион сомдон ашуун зыяндын ордун толтуруп берүүгө милдеттендирилген.