БИШКЕК, 8-фев. — Sputnik. Кыргызстандын куткаруучулары зилзала болгон Түркиянын Кахраманмараш шаарында ишке киришти. Бул туурасында Өзгөчө кырдаалдар министрлигинин маалымат кызматы кабарлады.
Билдирүүгө ылайык, куткаруучулар тобу Стамбул шаарына жетип, андан ары Кахраманмараш шаарына учуп барган. Эртең менен Түркиянын Ички иштер министрлигине караштуу Табигый кырсыктар жана өзгөчө кырдаалдар башкармалыгынын AFAD куткаруучуларынын базасына жайгашкан. Ал эми саат 11:30да жергиликтүү бийликтин берген тапшырмаларына ылайык, урандылардын астында калган адамдарды издеп, куткарууга киришкен.
Кыргызстандык куткаруучулар 67 адамдан туруп, курамында фельдшерлер, психолог, кинологдор бар.
Эске салсак, Түркияда 6-февралда миллиондон ашык адам жашаган Газиантепке жакын жерде күчү 7,8 жана 7,5 баллга жеткен эки жер титирөө болду. Ошондой эле Сирияда, Грузияда жана башка өлкөлөрдө ондогон жер титирөө катталган. Акыркы маалымат боюнча, Түркияда каза болгондордун саны 8500дөн, Сирияда 1000ден ашты. Ал эми жабыркагандар жыйырма миңден ашты.
Белгилей кетсек, жабыркагандарга жардам көрсөтүү үчүн Кыргызстанда бирдиктүү депозиттик эсеп ачылган. Ал эми материалдык түрдө берүүнү каалагандар жарандар Түркиянын Бишкектеги элчилигине алып барса болот.