БИШКЕК, 5-мар. — Sputnik. Бишкектеги РФ элчилигинин алдына Украинадагы кырдаалга байланыштуу Россияны колдогондор нааразычылык акциясына чыгышты. Бул тууралуу 24.kg агенттиги жазды.
Митингчилер "мындан ары унчукпай отуруу болбостугун айтып, нацизмге каршы экенин" билдирип жатат.
"Сегиз жыл бою Донбасстын жашоочулары Украина бийлиги тарабынан улутчулдук аракеттер качан токтойт деп күткөн. Бирок мындан ары унчукпай отурууга болбойт. Биз нацизмге каршыбыз. Биздин ата-бабабыз бул жолду басып өткөн. Бүгүн дүйнөдө тынчтык болушу үчүн күрөшүп жаткандарды колдойбуз. Кыргызстан силер менен!" — деп айтууда митингдин катышуучулары.
Эске салсак, 24-февралдын таңынан тарта Украина — Россия мамилесиндеги кырдаал башкача өңүт алган. Украина тараптан ЛЭР менен ДЭРге карата аткылоонун аягы үзүлбөй, аталган республикалардын жетекчилери РФ лидери Владимир Путинден жардам сураган. Мындан улам Путин эртең менен элине кайрылып, Донбасста атайын операция өткөрүү чечимин кабыл алгандыгын жарыя кылган. Учурда Россия тараптын Украинаны демилитаризация жана денацификация операциясы жүрүп жатат. Россиянын Коргоо министрлиги, Куралдуу күчтөрү соккуну Украина тараптын аскердик инфраструктуралары менен күч түзүмдөрүнө уруп жаткандыгын билдиришти. Тилекке каршы, эки жактан тең курман болгондор, жаракат алгандар бар.