Бишкек, 3-окт. — Sputnik. Бразилиянын жүздөгөн ири шаарында учурдагы президент Жаир Болсонаруга каршы нааразычылык акциялары өтүп жатат. Бул тууралуу РИА Новости жазды.
Рио-де-Жанейродогу акцияга PT, PSOL, PCdoB, PSB, Rede жана PDT аттуу коомдук кыймылдар, союздар жана солчул партиялар катышууда.
Акция бир эле учурда өлкөнүн 160 шаарында өттү. Анын катышуучулары президентке импичмент жарыялоону талап кылышууда.
Алардын айтымында, оорудан көз жумгандардын саны 600 миңге жакындап калганы менен вакциналарды сатып алуу кечиктирилип жатканы байкалууда. Жарандар колдоруна плакаттарды кармап алышкан. Анда жумушсуздук, ачкачылык, табигый газдын, күйүүчү жана дизель майынын кымбаттыгы боюнча көйгөйлөр жазылган.
Нааразычылыкка чыккандар коомчулукта популярдуу болуп бара жаткан мурдагы президент Луис Инасиу Лула да Силваны бийликке алып келүүнү каалашууда. Бразилияда президенттик шайлоо 2022-жылы өтөт.
Лула өзү массалык жөө жүрүшкө катышкан эмес, бирок лейбористтерден (PDT) талапкер Чиро Гомеш азыркы бийликти кулатуу үчүн солчул күчтөрдү биримдикке чакырды.
Бразилиядагы демонстрациялар ушул жылдын май айынан бери Болсонару өкмөтүнө каршы жалпы улуттук бешинчи демонстрация болуп саналат.