Эгер жумушчу кызматтан кеткен соң иш берүүчү эмгек китепчесин бербей кармап жүрө берсе, бул мезгил үчүн айлык акы төлөшү керек. Бул тууралуу Элдияр Карачалов Sputnik Кыргызстан радиосуна маек куруп жатып билдирди.
Анын айтымында, эмгек китепчеси мамлекеттик документ болуп эсептелгендиктен бир адамда бирөө эле болушу мыйзамга ылайык.
"Биздин өлкөдө, өзгөчө, аймактарда жумушчулар арасында эң көп кездешкен көйгөй — бул жумуш саатынын сакталбагандыгы. Тагыраак айтканда, көп учурда убактысынан ашыкча иштеп, бирок кошумча төлөнүүчү каражат алышпайт жана талап кылышпайт. Эмгек өргүүсү үчүн төлөнүп берилүүчү каражатты эс алууга чыгып баратканда эмес, бир айдан соң алышат. Ошондой эле бир мекемеде иштөөсүн кандайдыр бир себептер менен токтотсо, иш берүүчү эмгек китепчесин дароо бербей созуп жүрө берген учурлар да бар. Мындай кезде жумушчулар эч кабатырланбай эле профсоюзга кайрылса болот. Анткени иш берүүчү анын эмгек китепчесин канча күн, ай кармап отурса, ошол убакытка айлык акысын толук төлөп бериши зарыл болот", — деди Карачалов.
Ошондой эле ал үч жылдан бери аймактарда жумушчулардын укук, милдеттери тууралуу семинарлар уюштурулуп келерин кошумчалады.