БИШКЕК, 1-фев. — Sputnik. Президент Садыр Жапаров Коргоо министрлигин түзүү боюнча жарлыкка кол койду. Бул тууралуу өлкө башчынын маалымат кызматы кабарлады.
Анда айтылгандай, аталган жарлык Куралдуу күчтөрүн башкаруу системасын өнүктүрүүнү көздөйт.
"Коргоо иштери боюнча мамлекеттик комитеттин жана Куралдуу Күчтөрдүн Генералдык штабынын базасында Коргоо министрлигин түзүү максатка ылайык деп эсептелсин. Жарлыктан келип чыгуучу чараларды кабыл алуу өкмөткө сунушталсын", — деп жазылат маалыматта.
Куралдуу күчтөрдүн Генералдык штабын кайрадан Коргоо министрлиги деп өзгөртүү маселеси жакында каралып жатканы белгилүү болгон.
Эске салсак, бардык аскердик күчтөрдү бирдиктүү башкаруу максатында 2014-жылы Генералдык штаб түзүлгөн.
2018-жылы Жогорку Кеңеште Коргоо министрлигин кайтаруу маселеси көтөрүлгөн. Анда депутат Алмамбет Шыкмаматов Генштабдын генералдары чет мамлекеттерде таанылбай жатканын, анткени мындай орган сыртта анча маанилүү мекеме эместигин белгилеген.