БИШКЕК, 29-май — Sputnik. Ала-Бел ашуусунда жол кырсыгы катталды. Бул тууралуу окуянын күбөсү билдирди.
Кырсыктан тамтыгы чыгып калган автоунаанын видеосу "Короче" Telegram-каналына жарыяланган.
Видеодо кырсыктаган Honda Stepwgn жеңил машинасынын талкаланып, тоолуу жолдон бир топ алыс турганын көрүүгө болот. Окуянын күбөсү окуя Ала-Бел ашуусунда болгонун айтып, айдоочуларды этият болууга чакырган.
Жалал-Абад облусунун Жол кыймылынын коопсуздугун көзөмөлдөө башкармалыгынын маалымат кызматы ал кырсык Бишкек — Ош жолунун 219-чакырымда болгонун кабарлады.
"Алдын ала маалыматтар боюнча, каза болгондор жок, жабыркагандар такталууда. Ал жерге Токтогул РИИБдин ыкчам тергөө тобу жөнөп кеткен. Чогулган материалдар тиешелүү кызматка өткөрүлүп берилет", — деп билдиришти милициядан.
Айдоочу жол кырсыгына кабылганда кандай иш-аракеттерди көрүүсү керек? Sputnik Кыргызстан агенттигинин материалынан окуңуздар