БИШКЕК, 26-май — Sputnik. Соттолгон саясатчы Садыр Жапаровдун бир тууганы Райкүл Жапарова Польша мамлекетинде кармалды. Бул тууралуу Кыргызстандын ИИМинен билдиришти.
Ал Интерпол аркылуу мамлекеттер аралык издөөдө жүргөн. Учурда Башкы прокуратура Жапарованы мекенине экстрадициялоо маселесин карап жатат.
Райкүл Жапарова "Ысык-Көл" инвестициялык банкынын башкармалыгынын төрайымы болгон.
Жергиликтүү ЖМКлар анда Максим Бакиев банк кызматкери Райкүл Жапарованын жардамы менен ишкананы мыйзамсыз менчиктеп алганын жазышкан. Кийин аны төрайым кылып шайлашкан.
Жапарова Кыргызстанда 2015-жылы сыртынан соттолгон. Жапаровага мыйзамсыз жол менен алынган акча каражаттарын же башка мүлктөрдү легалдаштыруу, шылуундук жана кызмат абалынан кыянаттык менен пайдаланды деген айыптар тагылган.