БИШКЕК, 14-апр. — Sputnik. Саламаттык сактоо министрлигинин эки кызматкери коронавирус жуктуруп алганын Республикалык штаб билдирди.
Маалыматка ылайык, алардын бири ыкчам штабга тартылган ведомство алдындагы саламаттык сактоо уюмунун кызматкери болсо, экинчиси күзөт кызматында иштеген адам.
Жумушчулардан COVID-19 вирусу тастыкталгандан кийин алар менен байланышта болгон министрликтин бардык кызматкерлеринен анализ алынды. Жыйынтыгы аларда коронавирус жок экенин көрсөткөн.
Ооруну жуктуруп алгандар обсервацияга алынып, тийиштүү түрдө дарыланып жатканы айтылды.