БИШКЕК, 25-мар. – Sputnik. Талас облусунун ар бир районуна санитардык-карантиндик посттор орнотулду. Анда жарандар менен автотранспорттор тыкыр текшерилет. Бул тууралуу өкмөттүн Талас облусундагы өкүлчүлүгүнөн билдиришти.
Облус тургундарына өтө зарыл иш болбосо эч жакка барбай үйдө отуруу сунушталат.
"21-марттан тарта Талас облусунун кире беришинде, тагыраагы, Талды-Булак айылында пост орнотулган. Ал эми 24-марттан тарта Талас, Бакай-Ата, Кара-Буура, Манас райондоруна жана Талас шаарына санитардык-карантиндик посттор коюлду", — дешти өкүлчүлүктөн.
Посттордон өтө маанилүү иши барлар гана өткөрүлөт.