БИШКЕК, 22-ноя. — Sputnik. УКМКнын Коррупцияга каршы күрөшүү кызматы Кыргызстандын өнүгүү, инвестиция жана инновациялар боюнча борбордук агенттигинин жетекчисинин мурдагы орун басары Алексей Елисеевдин 120 миллион сомдук активин тапты. Бул тууралуу УКМКнын маалымат кызматы билдирди.
Ага ылайык, Экономика министрлигинин банкрот иштери боюнча департаментинин кызматкерлери Елисеевге таандык "Кристалл" ААКты текшерүү учурунда 120 миллион сомду мыйзамсыз чыгарып кетүүгө аракет кылышканы аныкталды. Ошол эле маалда алар Елисеевдин мүлкүн конфискациялоо боюнча соттун өкүмү чыкканын алдын ала билишкен.
Бүгүнкү күнү мамлекеттин эсебине 67 миллион сом которулду. Калган сумманы которуу аракеттери көрүлүүдө.
Алексей Елисеев Кыргызстандын өнүгүү, инвестиция жана инновациялар боюнча борбордук агенттигинин жетекчисинин орун басарлыгын аркалаган. Коомчулукта анын качкын президент Курманбек Бакиевдин баласы Максим Бакиевдин жакын досу болгону айтылып жүрөт. 2010-жылдагы апрель коогалаңынан кийин Кыргызстандан чыгып кетүүгө аргасыз болгон. 2010-жылы 25-августта Башкы прокуратура ага карата кылмыш ишин козгогон болчу.