Саламаттык сактоо министрлиги бейтапканаларды санариптештирүү боюнча иштерди этапка бөлүп аткарууда, учурда дарыгерлерди окутуу жүрүп жатат. Бул тууралуу Бахтияр Станбеков Sputnik Кыргызстан радиосунун "Ачык кеп" программасында маек куруп жатып билдирди.
Анын айтымында, электрондук кезек аркылуу адам үйдө отуруп эле каалаган дарыгерге күнүн, убактысын белгилеп, алдын ала жазыла алат.
"Электрондук саламаттык сактоо борбору бул жылы ооруканалардагы абалды тартипке келтирүү максатында электрондук кезекке туруу системасын иштеп чыкты. Учурда Нарын, Ысык-Көл, Талас облустарында бейтапкананын кызматкерлери окутуудан өттү. Бишкек шаарында төрт поликлиникага система коюлду. Биринчи ноябрдан тарта толук кандуу ишке киргизилет. Бул нерсе бейтаптарга бир топ жеңилдиктерди түзмөкчү. Бирок азыр көп адамдар сайтты колдонуп, жаңы системага көнүүсү кыйын болууда. Андан тышкары, электрондук медициналык амбулотордук карта Бишкектеги №8 үй-бүлөлүк дарыгерлер борборунда жана Ысык-Көлдүн үч шаарындагы ооруканаларда пилоттук негизде иштеп жатат", — деди Станбеков.
Ал электрондук кабинетке кирүү үчүн паспортто көрсөтүлгөн ПИНди жана телефон номерди терүү керектигин кошумчалады.