БИШКЕК, 6-окт. — Sputnik. Премьер-министр Мухаммедкалый Абылгазиев Ош облусуна болгон жумуш сапарынын алкагында Ноокат районунун Ак-Булак айылындагы Саты Токторов атындагы орто мектептин ачылышына катышты. Бул туурасында өкмөттүн маалымат кызматы билдирди.
Аталган билим берүү жайы төрт жылда курулуп бүткөнү белгиленет.
"320 орунга ылайыкталган мектептин курулушу 2015-жылы башталып, жаркыраган жана ыңгайлуу имарат курушуптур. Бул абдан жакшы көрсөткүч. Мында билим алуу да жагымдуу болот. Республиканын бардык аймактарында жаңы мектептер курулуп жатат. Быйыл эле 111 мектепте курулуш иштери жүргүзүлүүдө", — деген Абылгазиев.
Ошондой эле ал 2012-жылы билим берүү тармагына 21 миллиард сом бөлүнсө, акыркы 3 жылдын ичинде бул сумма 30 миллиард сомго чейин көтөрүлгөнүн кошумчалаган. Өкмөт башчы жаңы ачылган билим уясына компьютердик жабдууларды тапшырып, мугалимдерди кесиптик майрамы менен куттуктаган.
Премьер-министр кийинки сапарында Ош аймактык Шаар куруу жана архитектура башкармалыгынын "Бирдиктүү терезе" бөлүмүнүн иши менен таанышып чыккан.
Биздин Telegram-каналга жазылыңыз.