БИШКЕК, 27-сен. — Sputnik. Салык кызматы камсыздандыруу төгүмдөрү боюнча белгиленген пландык көрсөткүчтөрдү 100 пайызга аткаруу үчүн бардык зарыл болгон чараларды көрүүдө. Ар бир субъект боюнча конкреттүү аналитикалык иштер жүргүзүлүп жатканын аталган мекеменин маалымат кызматы билдирди.
Салык кызматы биринчи жарым жылдыктын жыйынтыгы менен 1,5 миллиард сом суммасында кем жыйналгандыгы тууралуу айтылган Социалдык фонддун төрагасынын билдирүүсүнө жооп берди.
Белгилей кетсек, Социалдык фонддун башчысы Медер Ирcаилов быйыл сегиз айдын жыйынтыгы менен камсыздандыруу төлөмдөрүн чогултуу 1 миллиард сомго кем болуп жатканын, эгерде чогултуу аракеттери ушул темп менен уланса, 2020-жылы январь, февралда пенсия төлөөдө кыйынчылыктар болорун айткан. Өкмөт башчысы Мухаммедкалый Абылгазиев Исраиловдун бул айткандарын сындап, элди дүрбөлөңгө салган жетекчи иштен кетиши керектигин билдирген.
"Салык кызматынын комплекстүү иштөөсүнүн натыйжасында 8 айдын жыйынтыгында 20,3 миллиард сом чогулуп, алты айдагы жыйналбай калган сумма азайып, 800 миллион сомду түзгөн", — деп айтылат маалыматта.
"Ведомство жер-жерлерде камсыздандыруу төгүмдөрүнүн тийиштүү суммаларын өз убагында жана толук өлчөмдө төлөөнүн зарылдыгы жөнүндө төлөөчүлөр арасында түшүндүрүү иштерин жүргүзүүдө", — деп айтылат маалыматта.
Белгилей кетсек, быйыл 1-январдан тарта камсыздандыруу төлөмдөрүн чогултуу функциясы Социалдык фонддон Салык кызматына берилген.
Биздин Telegram-каналга жазылыңыз.