БИШКЕК, 12-май — Sputnik. Петропавловск шаарында эл ташыган автобус өрттөнүп кетти. Бул тууралуу Sputnik Казакстан агенттиги жазды.
Кырсык 11-май күнү болду. Саат 10.29да 101 кызматына жүргүнчүлөрдү ташыган автобус өрттөнүп жаткандыгы тууралуу маалымат түшкөн.
"Унаанын ичиндеги 12 киши өз алдынча чыгып кетүүгө жетишкен. Өрт өчүрүүчүлөр келген маалда автобус толугу менен жалбырттап күйүп жаткан. Саат 10.42де тилсиз жоо өчүрүлдү", — деп айтылат бидирүүдө.
Жыйынтыгында автобус жарактан чыкты. Бактыга жараша, жабыркагандар болгон жок. Алдын ала маалыматка караганда, өрттүн чыгышына автонун электр зымдарынын тийишүүсү себеп болгон.
Бул акыркы үч күн ичиндеги экинчи өрт. 9-май күнү ушул эле шаарда дагы бир коомдук транспорт күйүп кеткен.