Масалиев 2006, 2010 жана 2016-жылдары Конституция өзгөртүлгөндө экс-президенттин кол тийбестиги деген түшүнүк алынып салынганын белгиледи. Мындан тышкары, анын айтымында, кызматты тапшыргандан кийин мыйзам алдында бардыгы бирдей болуш керек деген талапты коомчулук койгон, мыйзам долбоору ошол себептен киргизилүүдө.
"Эң негизгиси 12-беренени жокко чыгарып жатабыз. 2010, 2016-жылы Конституцияны өзгөрткөндө өткөөл жободо Конституцияга каршы келген мыйзамдын жоболору иштебейт, күчүн жоготот деп жазылып калган. Бул Конституциянын түз көрсөтмөсү", — деди ал.
Анын айтымында, Атамбаев премьер-министр болуп турганда 12-беренени алып салуу боюнча Жогорку Кеңешке мыйзам долбоорун сунуштаган.
Депутат ошондой эле Конституциялык палата дагы 12-беренени Конституцияга дал келбейт деп корутунду бергенин эске алуу менен мыйзам долбоорун биринчи окууда колдоп берүүгө чакырды. Жыйынтыгында комитеттин мүчөлөрү бир добуштан мыйзам долбоорун колдошту.
Алмазбек Атамбаев учурунда ушундай сунуш менен кайрылган-кайрылбаганы тууралуу Кыргызстан Социал-демократиялык партиясы (КСДП) төмөнкүчө жооп берди.
"Алмазбек Атамбаевге бул тема кызык эмес, андан башка иштери толтура. Башка комментарий жок", — дешти саясий уюмдан.
"Кыргыз Республикасынын президентинин ишмердигинин кепилдиктери жөнүндө" мыйзамдын 12-беренесинде мындай деп жазылган:
Кыргыз Республикасынын экс-президенти кол тийгис укукка ээ. Ал Кыргыз Республикасынын президентинин ыйгарым укуктарын аткарган мезгилинде жасаган аракеттери же аракетсиздиги үчүн жазык жана администрациялык жоопкерчиликке тартылышы, ошондой эле кармалууга, камакка алынууга, тинтүүгө, суракка алынууга же жеке текшерүүгө дуушар кылынышы мүмкүн эмес.
Кыргыз Республикасынын экс-президентинин кол тийгис укугу ал ээлеген турак жайга жана кызматтык бөлмөлөргө, ал пайдаланган транспорт каражаттарына, байланыш каражаттарына, ага таандык болгон архивге, башка мүлккө, документтерге, жүктөргө жана анын кат-кабарларына да жайылтылат.