БИШКЕК, 24-апр. — Sputnik. Кыргызстандык Алтынай Абдымомунова Индияда өтүп жаткан Miss Glam World – 2018 сулуулар сынагына катышып жатканы тууралуу маалымат аталган конкурстун расмий сайтында жарыяланды.
Коччи шаарында өтүп жаткан бул сынакка дүйнөнүн ар кайсы өлкөсүнөн келген 40 сулуу ат салышууда.
19-апрель күнү башталган конкурс ушул жуманын аягында бүтөт.
27-апрель күнү чыга турган жыйынтыкка көрүүчүлөр тарабынан берилген онлайн-добуш берүү дагы таасир этет.
Добуш берүү апта башында башталган.
Miss Glam World — индиялык режиссер Аджит Рави ээлик кылган Pegasus Ajit компаниясы тарабынан уюштурулуп жаткан кадырлуу эл аралык сынак. Баса, бул кыздар подиумга бикиничен чыкпаган жалгыз эл аралык сынак. Мындан тышкары, аталган компания Miss Asia жана Miss Queen of Indi сынактарын өткөрүп келет.
Былтыркы жылдын сентябрь айында Алтынай Абдымомунова Кыргызстандын намысын Тайванда өткөн Global Charity Queen – 2017 сынагында коргогон.
Ал эми үч айдан кийин Арменияда болгон "КМШ топ-модели" сынагында "Жылмаюу" категориясында жеңүүчү болгон.