БИШКЕК, 28-фев. — Sputnik. Соңку 17 жылда 195 кыргызстандык Кытай жарандары менен никеге турган. Бул туурасында Мамлекеттик каттоо кызматынан билдиришти.
Аталган ведомство буга чейин айрым ЖМКлардагы 30 миң кыргыз жараны кытайлыктар менен турмуш курган деген маалымат жалган экенин белгиледи.
"Калкты жана жарандык актыларды каттоо департаментинин расмий маалыматы боюнча 2000-2017-жылы Кыргызстанда Кытай жарандары менен никеге тургандардын саны 195ти түзөт. Ал эми Бакыт үйүнөн 112 түгөй нике күбөлүгүн алган. Ош шаары менен облуста 16, Жалал-Абадда 4, Чүйдө 21, Ысык-Көлдө 3 жана Нарында 1 түгөй катталган", — деп айтылат билдирүүдө.
Ошондой эле 11 балага туулгандыгы тууралуу күбөлүк берилген. Анын баарын ата-эне Бишкектен алган.
Буга чейин Бишкектеги нике агенттиктери кыргызстандыктарды чет өлкөнүн жарандары менен кантип тааныштырары тууралуу да макала жарыяланган.