БИШКЕК, 26-фев. — Sputnik. Билим берүү жана илим министри Гүлмира Кудайбердиева айрым мугалимдердин оройлугу окуучулардын өз жанын кыюуга, мектепке барбай коюусуна себеп болуп жатканын министрликтин 2017-жыл боюнча жыйынтыктоочу коллегиясында билдирди.
Кудайбердиева билим берүү министрлиги билим берүү чөйрөсүнүн комплекстүү коопсуздук стандарттарын иштеп чыгуу боюнча бир катар дүйнөлүк уюмдар менен биргеликте иш алып барып жатканын кошумчалады. Иш процессинде билим берүүдө физикалык, экологиялык, психологиялык коопсуздук эң негизги нерселер экени белгилүү болгон.
"Тилекке каршы көптөгөн мектептерде окуучулар мугалимдердин кыйкырык жана орой мамилесинен жабыркап жатат. 2017-жылдын декабрында педагогдордун кесиптик этиканы кынтыксыз сактоосу жөнүндө буйрукту дагы бир жолу жөнөтүүгө аргасыз болдук. Анткени Миң-Куш айылындагы мектептин мугалими менен окуучулардын ортосундагы чыр-чатак нормалардын сакталбай жатканын көрсөттү. Мугалимдер тарабынан психологиялык, кээде физикалык зомбулук балдардын суицидине жана окууну каалабастыгына алып келүүдө", — деди министр.
Билим берүү жана илим министрлигинин коллегиясына Кыргызстандын бардык аймактарынан мугалимдер, билим берүү башкармалыктары менен бөлүмдөрүнүн өкүлдөрү келишкен. Коллегиянын жыйынтыгында токтом бекитилип кабыл алынат.
