БИШКЕК, 29-янв. — Sputnik. Электр энергиясын көп колдонгон мекемелерге, соода-сатык жайларга, унаа жуучу, тез тамактануучу жай эээлерине электр энергияны үнөмдүү пайдалануу боюнча Мамэкотехинспекция тарабынан түшүндүрүү иштери жүрүүдө. Бул тууралуу мекеменин маалымат кызматы билдирди.
ТЭЦтеги авариялык абалдан улам Бишкек шаарында электр энергиясын колдонуу кескин көбөйгөн.
"Жарандарды үзгүлтүксүз электр энергиясы менен камсыздоо максатында Мамэкотехинспекция тарабынан электр энергиясын көп колдонгон мекеме-ишканаларга кафе жана мончого ошондой эле оюн зоок тармактарына электр энергиясын үнөмдөө боюнча билдирүү таратылууда", — деп айтылат маалыматта.
Мекеме ошондой эле өрттүн кесепеттерин алдын-алуу максатында, жарандарды электр жабдууларын колдонууда өрт коопсуздук эрежелерин сактоого чакырат. Себеби, катуу сууктун айынан айрым жарандар колдо жасалган, коопсуздук талаптарына жооп бербеген жылыткычтарды колдонуп жатышат.