БИШКЕК, 22-янв. — Sputnik. Кыргызстандагы интернет колдонуучулар бою эки метр болгон жигиттер менен жапалдаш бойлуу кишилердин чогуу түшкөн сүрөтүн катуу талкууга алышты.
Анда узун бойлуулар алтайлыктар, кыскалары кыргыздар экени айтылган. Андан сырткары, сүрөт Ысык-Көлдөгү Курманжан датка атындагы Көчмөн цивилизация борборунда 2016-жылы өткөн Алтай цивилизациясы форуму учурунда тартылганы айтылган.
Sputnik Кыргызстан агенттиги Көчмөн цивилизация борборунун директору Аида Алымова менен байланышканда бул сүрөттү ага бир топ киши жибергенин маалымдады.
"Сүрөт биздин борбордо тартылган эмес, ошентсе да имараттар аябай окшош экен. Бизде жерге төшөлгөн таштын өңү башка, терезелер дагы чоң. Бул сүрөт былтыр биз Алтайга барганда тартылганбы деген да ой кетти. Бирок кийинчерээк маалым болгондой сүрөттөгүлөр Казакстандын "Арлан" театрынын актерлеру болуп чыкты", — деди Алымова.
"Арлан Жете" улуттук костюмдар театрынын директору Асхат Халимов сүрөттө актерлор экенин тастыктады.
"Эгер сүрөттү оңдон солду карай карасак актерлордо гундардын, кыпчактардын жана казактардын кийимдерин көрүүгө болот. "Арлан" театрынын балдары. Бул Москва дагы эмес. Себеби, сүрөттөгү эки актер Казакстандын ичиндеги гана иш-чараларга катышат. Ошондуктан сүрөт Казакстанда тартылган деп айта алам. Анткени соот киийп турган актердун ордуна ВДНХга мен баргам", — деди Халимов.
Ал ошондой эле театрдын актерлору иш-чараларга Казакстандын атынан катышарын кошумчалап, театрга бою 2 метрден узун болгон актерлор тандаларын айтты.
Ачык булактарындагы маалыматтарга ылайык, театрдын коллекциясында түрк элинин баатырларынын жүздөгөн кийимдеринен тарта хан менен кагандардын кийимдерине чейин бар.