БИШКЕК, 16-окт. — Sputnik. Ноябрь айындагы аба ырайынын орточо температурасы 3…5 градусту түзөт. Бул тууралуу Sputnik Кыргызстан агенттигине Кыргызгидрометтин метеорологиялык бөлүмүнөн билдиришти.
Чүй облусунда ноябрь айынын жарымынан өткүчө абанын күндүзгү температурасы 12…17° жылуу болушу күтүлөт. Ал эми айдын акыркы он күндүгүндө абанын температурасы төмөндөп, күндүзү 2…3 градус жылуу, түнкүсүн 7…12 суук болушу ыктымал.
Талас өрөөнүндө абанын айлык орточо температурасы климаттык нормага жакын болуп, 2…4° жылуу болушу күтүлөт. Бирок айдын аягында аба салкындап, күндүз 0…5 градус гана жылуу болот.
Ысык-Көлдө абанын температурасы климаттык нормага жакындап, 12…17 градус жылуу болушу күтүлүүдө. Бирок айдын акыры жумасында аба ырайынын күндүзгү температурасы 0…5 градус жылуу, түнкүсүн 8…13 градус суук болушу ыктымал.
Нарын облусунун тургундары дагы айдын жыйырмаларына чейин бул жылдын акыркы жылуу күндөрүнөн ырахат алышат. Күндүзү 8…13 градус жылуу болуп жаткан аба ырайы айдын үчүнчү он күндүгүндө түнкүсүн 15…20 градуска, күндүзкүсү 0…5 градуска чейин төмөндөйт.
