Спирт ичимдиктерин сатууга тыюу салынган кыргыз айылдары

БИШКЕК, 21-июн. — Sputnik. Депутаттар коомдук жайда спирт ичимдигин ичкендерге карата жазаны күчөтүүнү демилгелеп чыгышты. 

Мыйзам долбоорго ылайык, майда бейбаштык, коомдук жерлерде алкоголдук ичимдиктерди ичүү, ошондой эле мас абалында жүргөндүгү үчүн айып пулду оорлотуу пландаштырылууда. Ошентип азыркы учурда белгиленген 100-300 сомдун чегиндеги административдик айыптын өлчөмүн 1000ден 3000 сомго чейин көбөйтүү сунушталып жатат.

Sputnik Кыргызстан агенттиги эч кандай мыйзамы жок эле коомчулуктун жалпы чечими менен ичимдик сатууга тыюу салынган аймактарды таап, айыл башчылары менен жергиликтүү тургундарынан төмөндөгү маалыматтарды алды. 

1. Алай районуна караштуу Мурдаш айылы — бул айылда үч жыл мурда ичимдик сатууга тыюу салынган. Айылда уруш-жаңжал, мушташ көбөйгөндүктөн айыл аксакалдары чогулуп, спирт ичимдиктерин сатууга тыюу салуу боюнча маселени көтөрүп, айыл өкмөткө кайрылышкан. Натыйжада айыл башчылыгы тарабынан майрам күндөрү бардык дүкөндөргө ичимдик сатууга тыюу салынган. Ал эми коомдук жыйналыштын аксакалдары менен активисттери жалпы элге түшүндүрүү иштерин жүргүзгөндөн кийин бардык дүкөндөр ичимдик сатууну токтотушкан. Ленин айыл өкмөтүнүн башчысы Жеңишбек Исраиловдун айтымында, мындай иш-чарадан кийин ичимдикке берилгендердин саны кыйла азайып калган. 

2. Лейлек районуна караштуу Кулунду айылы — ичимдик сатууга үч жыл мурун тыюу салынса, бир жыл мурун иш аракет толугу менен өз максатына жетип, бир дагы жерде ичимдик сатылбай калган. Мындай демилгени айылдагы жаштар коому көтөрүп, аксакалдар аны колдоп беришкен. Учурда айылда жаштардын көңүлүн спортко буруу максатында 1970-1997-жылкы айыл тургундары өздөрү каражат чогултуп, айылдын чок ортосуна футбол ойноочу стадион курдуруп жаткандыгы тууралуу жергиликтүү тургун Мухидин Абдурасулов билдирди. 

3. Ноокат районуна караштуу Караке айылы — 2008-жылдан тарта тыюу салынган. Бирок ошентсе да ичимдик саткан дүкөндөр табылып турган. Мындай учурда аксакалдар уялта турган сөздөрдү айтып, тыйып турганын жергиликтүү жашоочу Дамирбек Нарматов билдирди. 

4. Ноокен районуна караштуу Киров айылы — айыл башчы Рахимжан Гапаровдун айтымында, спирт ичимдиктерине тыюу салуу боюнча коомдук чечим үч жыл мурун чыккан. Элдик жыйын өткөрүлгөндөн кийин айыл башы менен аксакалдар дүкөнчүлөрдүн үйүн кыдырып, түшүндүрүү иштери жүргүзүлгөн. Натыйжада учурда бир дагы дүкөндө арак сатылбайт. Керек болсо той-топурлар дагы ичимдиги жок эле өткөрүлүп калган. 

5. Алай районуна караштуу Гагарин айылы — бул айылда дагы үч жыл мурун ичимдик сатууга тыюу салынган. Бирок той-топурларда аз көлөмдө болсо дагы ичимдиктин түрлөрү коюлуп калган учурлар байкалып турат.