БИШКЕК, 16-июн. — Sputnik. Спирт ичимдиктери менен баңги заттарды колдонгон өспүрүмдөрдүн ата-энелерин үч миң сомго чейин айып пулга жыгуу демилгеси көтөрүлдү. Мындай түзөтүү административдик жоопкерчилик кодексине киргизилип жатат.
Демилгечи катары Жогорку Кеңештин 17 депутаты чыкты. Документте коомдук жайларда спирт ичимдиктерин ичүү кадимки көрүнүшкө айланып бара жатканы айтылат. Ал эми мындай көрүнүшкө милиция көңүл деле бурбай калган. Өспүрүм балдар чоңдордон үлгү алып эрте ичип башташканы белгиленет. Буга ылайык кылмыштуулуктун көпчүлүгү спирт ичимдиктерине байланыштуу болуп жатканы айтылат.
"Коомдук жайларда спирт ичимдиктерин ичкен жарандарга карата жазаны күчөтүү каралып жатат. Айып пулдун көлөмү азыркы учурда 100-300 сом болсо, эми 1000-3000 сомго чейин көбөйтүү сунушу айтылды", — деп белгиленет мыйзам долбоордо.
Демилгечилер мыйзам бузуучуларды коомдук кара жумуштарга салып жазалоону дагы сунушташууда.
Мындан тышкары, өспүрүм балдар спирт ичимдиктери менен баңги зат колдонушса алардын ата-энелерине эки миңден үч миң сомго чейин айып пул салуу сунушталып жатат.
