Жапаров: каада-салт менен илим-билимди айкаштыра жаңы кыргыз мүнөзүн жаратчу учур келди!
22:06 30.08.2025 (Жаңыртылды: 11:03 31.08.2025)
Жазылуу
БИШКЕК, 30-авг. — Sputnik. Тээ байыркы ата-бабалардан бери келаткан нарк-насил, каада-салтыбызды азыркы заманбап илим-билимге жуурулуштуруп, жаңы кыргыз мүнөзүн жаратууга мезгил жетти. Мындан аркы аракетибиз дал ушул багытта болмокчу. Бул тууралуу президент Садыр Жапаров Жалал-Абадда шаарында облустун жаңы административдик имаратынын салтанаттуу ачылышында кыргызстандыктарды Эгемендүүлүк күнү менен куттуктап жатып айтты.
Өлкө башчы Кыргызстандын тарыхына, мамлекеттүүлүктү түптөгөн ата-бабалардын баскан жолуна токтолуп, ушу тапта мамлекетте бардык тармакта болуп жаткан өзгөрүүлөрдү тизмектеди.
Буга чейин Эгемендүүлүк күнү Чүй, Ош облустарында өтүп келгенин айткан президент кийинки жылы бул орчундуу дата Талас дубанында майрамдаларын белгиледи.
Мамлекет жетекчисинин сөзүнүн урунттуу учурлары:
конституциялык реформа бийликтин архитектурасын өзгөрттү, экономикада жигердүү өсүштүн белгилери байкалып, коомдук турмуш турукташты. Көп векторлуу тышкы саясат жолго коюлду;
кооз, бийик имараттарды, жаркыраган жолдорду, жаңы ишканаларды салууну жолго койдук. Эми ар бир жарандын жан дүйнөсүнүн тазалыгы, руханий дүйнөсүнүн байлыгы, адамгерчилиги, меймандостугу, пейилинин кеңдиги, билиминин тереңдиги менен өзгөчөлөнгөн жаңы Кыргызстанды курууга көңүл бурушубуз керек;
ата-бабалардан бери келаткан нарк-насил, каада-салтыбызды азыркы заманбап илим-билимге жуурулуштуруп, жаңы кыргыз мүнөзүн жаратууга мезгил жетти. Мындан аркы аракетибиз дал ушул багытта болмокчу;
ар бир кыргыз жараны мекенинде да, чет жерде да башын бийик көтөрүп, эгемен Кыргызстандын жараны экенин сыймыктануу менен айтып жүрүшү шарт;
ар бирибиз көз карандысыздыкты көзүбүздүн карегиндей сактоого милдеттүү экенибизди эзели эсибизден чыгарбайлы. Эгемендик майрамыбызды ар жылы белгиленчү майрам катары эмес, анын маани-маңызын, кадыр-баркын сезип-билип, жан дилибиз менен кабылдайлы;
эгемендик – бул Жараткан ыроологон ырыскы, бабалар калтырган аманат жана ошону менен бирге чоң жоопкерчилик. Ар бирибиз Ата Мекен үчүн ак, так кызмат өтөп, аны кийинки муундарга өткөрүп беришибиз парз. Бардык этностун өкүлдөрү Кыргызстанды “Мекеним” деп сүйүп, ысык-суугуна күйүп, кызыл байрагын булгалап, даңктап-даңазалай берсин;
ынтымагыбызды чыңдап, күчүбүздү бириктирип, жаңы Кыргызстанды өнүккөн мамлекеттердин катарына кошолу.
